Hrvatska Kostajnica zbog odrona i polava skoro uništena. Kuće oštećene, a šest je potpuno “nestalo”. Zvaničnici su došli, slikali se i otišli, piše Index.hr.
Jedna od onih koji su u odronu ostali bez kuće je i Refika Hamzagić. Ona kaže da je kuća u sekundi počela da se ruši.
– Bila sam na dvorištu. Elektrodistribucija je skidala kablove jer su se i bandere već nakosile. U sekundi, kuća se ruši. Od kuće se ruši štala. Odjednom puca kuća, zemlja kreće, ispričala je Refika za Novu TV.
Kako navodi Index.hr, ona je u odronu ostala bez svega i trenutno ima samo odjeću u kojoj je bila u tom trenutku i jaknu koju joj je dala komšinica.
Kaže da mora redovno da pije ljekove jer je srčani bolesnik, a ni njih nema, niti novca.
Kako su juče prenijeli hrvatski mediji, Hrvatsku Kostajnicu obišao je i hrvatski premijer Andrej Plenković, a čak je i razgovarao sa Refikom. Ona kaže da je premijeru i njegovim saradnicima objasnila u kakvoj se situaciji našla, odnosno da je izgubila sve i da sada nema ni ljekova, ni novca.
Kako je rekla, oni su joj obećali da će dobiti sve što je potrebno. Međutim, čim su otišli, situacija se promijenila.
– Dok je bio gospodin Plenković i Žinić tu, rekli su mi da ima gospođa doktor, dobiću ljekove. Oni su otišli, naslikali su se, a doktora nigdje nema. Meni su izmjerili pritisak i dobila sam tableticu da se smirim. I jedan andol, ispričala je Refika.
Dodala je da su joj rekli da pozove svog doktora, ali nakon što joj je sve uništeno, ona nema ni telefon.
Izvor: Index.hr/B92