Jedan od najpoznatijih engleskih arbitara Mark Klatenburg piše knjigu koja će uskoro biti objavljena pod nazivom ”Zviždač”.
Tabloid ”Dejli Mejl” je objavio jedan dio knjige i pomenuo anegdotu nakon derbija između Čelsija i Mančester junajteda.
Sve se dogodilo prije desetak godina, Junajted je u Londonu slavio 3:2.
– Znao sam da će mi biti teško, navijači Čelsija su me uzeli na zub. Nisam se time previše opterećivao, ali onda sam doživio strašne stvari. Kad sam nakon utakmice išao u svlačionicu, čuo sam veliku buku ispred. Bilo je psovki i svega. Kad sam izašao, Džon Obi Mikel me je napao, vikao je da će mi slomiti noge. Zamahivao je i pokušao da me udari, piše sudija i nastavlja:
– Spasili su me redari. Nije bilo lagano, Mikel je strašno jak momak. Oko mene je sve bilo puno ruku, a ja sam samo gledao kako da pobjegnem.
Nakon svega je uslijedilo ono najgore – Klatenburg je optužen za rasizam.
– Pisalo je da sam rekao Mikelu da je majmun. Bilo mi je odvratno čak i da čitam to, plaši me taj rječnik. Došao sam kući, zaključao se i izolovao. Bio sam na ružnom mjestu jedno vrijeme, a onda sam dobio neočekivanog prijatelja. Nazvao je ser Aleks Ferguson i kasnije me branio u javnosti, opisao je Klatenburg.