Više od 1.100 policajaca širom Engleske i Velsa nalaze se pod istragom za seksualno ili porodično nasilje, što je podstaklo nove pozive javnosti da procedure provjere policijskih službenika i nedoličnog ponašanja budu radikalno revidirane.
Od svih osumnjičenih, 180 policajaca je dobilo dozvolu da nastave da rade normalno, uprkos težini krivičnih djela.
Od 1.151 policajca koji je pod istragom, 428 radi sa ograničenim ovlašćenjima, dok je 378 suspendovano, prenio je Gardijan.
Najveći broj policajaca koji su pod istragom pripadaju gradskoj upravi Londona, gdje je osumnjičeno 657 policajaca za seksualno ili porodično nasilje, a neki i za oba djela.
Novi podaci dolaze devet mjeseci nakon objavljivanja izvještaja nezavisne revizije, koju je vodila članica gornjeg doma parlamenta Luiz Kejsi, u kojoj se oštro kritikuju kultura i standardni ponašanje unutar policije.
U izvještaju je policija optužena za institucionalni rasizam, mizoginiju i homofobiju.