Republikanski predsjednički kandidat na predstojećim izborima Donald Tramp kaže da i dalje smatra da pitanje zabrane abortusa treba odrediti zakonima saveznih država SAD, a ne donošenjem nacionalne zabrane abortusa.
U objavi na svojoj društvenoj mreži Truth bivši američki predsjednik rekao je kako podržava pobačaj u slučaju silovanja, incesta i zaštite života majke. Ponovio je i kako podržava dostupnost vantjelesne oplodnje.
U obraćanju nije rekao da bi tražio zabranu pobačaja na državnom nivou ako se vrati u Bijelu kuću. Tramp smatra kako je zaslužan za odluku Vrhovnog suda iz 2022. kojom je ukinuto pravo na pobačaj na federalnom nivou, aludirajući time na njegova naimenovanja konzervativnih sudija u to tijelo.
„Moj stav je da danas s pravnog gledišta imamo pobačaj svugdje gdje je bio željen. Države će odlučivati glasanjem ili u skupštinama ili možda oboje. I šta odluče mora biti zakon države. U ovom slučaju, zakon savezne države”, rekao je republikanac.
Tramp nije govorio o nedjelji trudnoće do koje bi podržao abortus.
Od početka kampanje za predsjedničke izbore u novembru on se klonio tog pitanja važnog za američke birače. Iako ankete pokazuju da većina Amerikanaca podržava restrikcije pobačaja nakon prvog tromjesječja, istraživanja pokazuju i da velika većina želi da odluku donose pacijent i ljekar, a ne vlasti, piše agencija Rojters.