Juventus nije dobro otvorio sezonu u Seriji A, prvu pobjedu je upisao tek u petom kolu (savladao je Speciju 3:2), ali iskusni štoper Đorđo Kjelini vjeruje da timu treba samo malo vremena.
Bio je slikovit kada je pričao o trenutnoj situaciji u klubu, nakon što ga je ljetos napustio Kristijano Ronaldo.
– Moramo da održimo naš brod mirnim u olujnom moru. Vidjećemo da li ćemo iz ove situacije izaći pomalo ulubljeni ili sa punim jedrima, ali stići ćemo u luku. Kao i za sve, potrebno je vrijeme da se pronađe ravnoteža, rekao je Kjelini i dodao:
– Kada postoje veliki šokovi, ekološki poput zemljotresa, potrebno je malo vremena da se sve sredi i polako ponovo pokrene. Nažalost, u današnjem svijetu nema strpljenja, istakao je 37-godišnji kapiten ”stare dame”.