Gradonačelnik Prištine saopštio je danas da glavni grad Kosova izlazi iz karantina.
“Priština danas izlazi iz karantina. Molim vas i dalje da se ne opuštate, što pažljiviji budete šanse su veće da ćemo što prije popustiti mjere. …opasnost još nije prošla i iako je ovo dobra vijest, ostale mjere ostaju na snazi. Ostanite kod kuće!”, napisao je Špend Ahmeti na Facebooku.
Priština je 11. aprila proglašena zonom karantina, pošto je odjednom u gradu bilo 20 slučajeva zaraženih korona virusom.
Posljednjih dana nije bilo novih slučajeva zaraze u Prištini, a po podacima nadležnih još je aktivan 21 slučaj ranije zaraze.
Ustavni sud Kosova je juče donio presudu po kojoj su Vlada i Ministarstvo zdravlja u dva slučaja prekršili Ustav jer su bez odluke Skupštine Kosova uveli mjere za ograničavanje slobode kretanja građana.
Zato su sva ograničenja slobode kretanja građana bila neustavna, kao i kazne i hapšenje na osnovu tih odluka.