Košarkaši Toronta prvi put u istoriji postali su šampioni NBA lige. Reptorsi su u šestoj utakmici velikog finala pobijedili dvostrukog uzastopnog prvaka Golden Stejt u Orakl areni 114:110 i ukupnim rezultatom 4-2 došli do prvog pehara u 24 godine dugoj istoriji franšize.
Za najkorisnijeg igrača finalne serije drugi put u karijeri proglašen je Kavaj Lenard.
Toronto je ujedno postao i prvi tim iz Kanade koji je došao do šampionskog prstena, ali i prva ekipa koja je u finalu tri puta u gostima uspjela da savlada aktuelnog šampiona lige.
Kajl Lauri je bio odličan sa 26 poena (4/7 za tri), uz 7 skokova i 10 asistencija, isti broj poena imao je i Paskal Siakam, uz 10 skokova, Vanvlit je dodao 22 (5/11 za tri), baš kao i Lenard (7/16 iz igre, 1/5 za tri).
Kod Voriorsa, koji nisu uspjeli četvrti put u posljednjih pet sezona da osvoje titulu, Tompson je do povrede postigao 30 poena (4/6 za tri), Andre Iguodala je zabilježio 22, Kari 21 (3/11 za tri), a Drejmond Grin 11, uz 19 skokova i 13 asistencija.