Pribilović: Etničko i vjersko nasilje se ne zove – vršnjačko

Nažalost, o napadu na sportiste iz Sarajeva većina naših medija i odgovornih funkcionera govori kao o “vršnjačkom nasilju”. Ali, nijesu se potukla tamo neka djeca ispred škole oko neke cure ili ko će prvi da igra basket. Zato ovo nije slučaj vršnjačkog nasilja, ocijenila je poslanica Demokratske partije socijalista (DPS), Suzana Pribilović.

“Riječ je o nasilju na etničkoj i vjerskoj osnovi. Dječaci su napadnuti isključivo zbog svoje etničke i vjerske pripadnosti, i dok se to baš tako ne definiše, i osudi medijski i politički, neće ni biti adekvatno adresirano u društvu. Odnosno, biće prikriveno iza floskule o “vršnjačkom nasilju”, a zapravo je mnogo opasnije”, istakla je ona.

Takvom praksom, smatra Pribilović, nastaviće se “stavljanje pod tepih” činjenice, da kod nas u Crnoj Gori u posljednje vrijeme, kako kaže, raste mržnja i netrpeljivost prema pripadnicima drugih etničkih i vjerskih grupa i da ovo nije ni prvi, a nažalost ni posljednji ovakav slučaj.

“Zato je važno podizati svijest u društvu o alarmirajućim motivima koji stoje iza ovakvih napada, etnički i vjerski obojenih. Važno je osuditi one aktere našeg društva i udruženja koja se kriju iza religije a zapravo siju klicu podjele i mržnje prema drugome, i indoktriniraju mlade ljude mržnjom prema drugom i drugačijem”, ističe poslanica DPS-a.

Nažalost, dodaje ona, sve ovo podsjeća na našu ne tako davnu, mračnu prošlost, na “incidente koji su naizgled bili banalni a slijedili su sve gori i opasniji”.

“Zato smo kao društvo dužni, za početak, da pogubne pojave nazivamo pravim imenom, a ne da ih skrivamo eufemizmima i pogrešnim dijagnozama stanja u društvu”, zaključuje Pribilović.