Službenici Ministarstva unutrašnjih poslova, Sektora za borbu protiv kriminala jutros su izveli dvije odvojene akcije, izvršili pretrese na desetine lokacija i lišili slobode pet osoba.
Kako navodi državni sekretar Petar Koprivica akcija sprovedena u Rožajama je nastavak kontinuirane borbe razbijanja lanca krijumčarenja roba i prekograničnog kriminala u sjevernim opštinama.
“Uhapšene su četiri osobe, u sklopu predmeta procesuirano 16 lica i podnijeto osam krivičnih prijava zbog krivičnog djela krijumčarenje i nedozvoljena trgovina. Oduzeto je oko 579 hiljada komada cigareta vrijednih preko 70 hiljada eura i druge akcizne robe vrijedne pet hiljada eura. U akciji na Cetinju lišen je slobode službenik Ministarstva unutrašnjih poslova zbog krivičnog djela zloupotreba službenog položaja u produženom trajanju, gdje je krivičnom prijavom obuhvaćena i njegova načelnica. Oni se terete da su izvršili krivična djela u do sada utvrđenih 17 predmeta”, navodi Koprivica.
Ove akcije su potvrda naše beskompromisne borbe, kako protiv organizovanog kriminala i korupcije tako i čišćenja unutar naših redova, a sa ciljem obnove povjerenja u institucije sistema.
“Samo kroz jedinstvo, profesionalan i zakonit rad i institucionalno djelovanje svih pojedinaca unutar sistema bezbjednosti, možemo poslati jasnu poruku da će snaga države nad kriminalom biti neupitna”, poručuje Koprivica.