Samo prije par dana imali smo ljetnje temperature do 30 stepeni, a jutros je jedva desetak. Napadao je i snijeg u visokom zaleđu Boke i na Orjenu.
Stanovnici Vrbanja nam kažu da je zahladnilo, pa uveliko griju. Rano jutros je bila temperatura samo jedan stepen, a kasnije pet-šest. Ipak, snijeg je tek od 1100 m nadmorske visine. Orjen je u magli, a snijeg mokar. Najviše ga ima od 1400 m ka vrhu, piše Novski portal.
Na Orjenskom sedlu je 25 cm snijega, pričaju nam Radovići koji su se i jutros zaputili ka planini i poslali nam „sniježne fotografije“.
“Od jutros je cijela strana od BIH, od podnožja Borovika prema Subri u magli i sve je pod snijegom. Samo Vrbanj nije, ali dosta se nisko spustio“, pričaju nam Branko Palikuća i Zaga Radović.
Čudne su klimatske promjene, pa je tako već olistala bukva, navode i u PK Subra.
“Sve je zeleno, skoro do najviših vrhova do kojih raste bukva. Pitanje je hoće li joj snijeg štetiti. Od snijega neće, ali ako bude i mraza onda je čak i dobro što je napadao snijeg jer možeda zaštiti vegetatciju od pravih mrazeva koji su na temeperaturama ispod nule“.
Avanturistički park na Vrbanju otvoren je prošlog vikenda. Tada je bilo lijepo vrijeme, ali ovog baš i nije za avanture na 1100 m nadmorske visine.
Park je u bukovoj šumi i jedan je od najsavremenijih adrenalinskih parkova u regionu. Rasprostire se na 7 hiljada kvadratnih metara na kojima je u četiri poligona raspoređeno 44 elementa, a kao poseban peti poligon je 200 metara dugački zip-line.