Slovački Vrhovni sud osudio je bivšeg vojnika Miroslava Marčeka na 25 godina zatvora zbog ubistva istraživačkog novinara Jana Kucijaka.
Presuda žalbenog suda protiv Marčeka konačna je i na nju se više ne može uložiti žalba, potvrdila je portparolka suda Aleksandra Vazanova.
Marček je ranije ove godine priznao da je u februaru 2018. ubio Kucijaka i njegovu vjerenicu Martinu Kušnirovu pucajući iz vatrenog oružja u glavu i grudi.
Tom je presudom Vrhovni sud ispravio blažu kaznu specijalnog kaznenog suda u Pezinoku kod Bratislave. Tamošnje sudije su u aprilu osudili Marčeka na 23 godine jer su mu u okolnosti pripisali činjenicu da je priznao krivicu i dao istražiteljima dragocjene podatke o onima za koje se pretpostavlja da su naručili ubistvo.
Međutim, javni tužilac insistirao je na maksimalnoj kazni zbog težine krivičnog djela. Kucijak je pisao o povezanosti slovačke i italijanske mafije.
Istraživački novinar objavio je više od desetak članaka o preduzetniku Marijanu Kočneru. U članku objavljenom neposredno prije ubistva Kucijak je optužio Kočnera da je umiješan u šemu varanja na porezima, a uspio je da dokaže da je Kočner na nezakonit način zaradio milione eura.
Kucijak je postao poznat po otkrićima o utaji poreza i mnogobrojnim prevarama poslovnih ljudi povezanih s vladajućom strankom zemlje Smer.
Takođe je pisao o povezanosti slovačkih državljana s italijanskom mafijaškom organizacijom Ndrangeta.
Izvještaj objavljen nakon njegove smrti o mogućim vezama između italijanskih mafijaških klanova i slovačkih državnih službenika pokrenulo je masovne proteste protiv korupcije i dovelo do ostavke tadašnje vlade.
Kočner je više puta opovrgnuo da je naredio i platio Kucijakovo ubistvo. U septembru je oslobođen krivice za taj zločin.