Neredi su izbili na protestima protiv kovid mjera u Briselu u nedjelju, na kojem je učestvovalo nekoliko desetina hiljada ljudi, prenosi Guardian.
Marš je započeo mirno, ali policija je kasnije ispalila vodene topove i suzavac kao odgovor na grupu učesnika koji su policiju gađali raznim predmetima.
Nekoliko demonstranata zatečenih u sukobu nosilo je kapuljače i flamanske nacionalističke zastave. Sukob s policijom dogodio se u blizini vladine četvrti belgijskog glavnog grada.
Policija je saopštila da je 35 hiljada protestanata marširalo sa Sjeverne stanice u Briselu protiv nove runde kovid mjera koje je vlada najavila u srijedu.
Demonstracije, nazvane “Zajedno za slobodu”, uglavnom su bile usmjerene na zabranu pristupa nevakcinisanima u mjestima kao što su restorani i barovi. Evropa se bori s još jednim valom zaraza i nekoliko je zemalja pooštrilo mjere uprkos visokom nivou vakcinacije.