Fudbaleri Mančester junajteda pobijedili su Mančester siti rezultatom 2:1 u 20. kolu Premijer lige.
Drama u engleskom fudbalu se nastavlja i nakon završenog gradskog derbija, razlika između Sitija i Junajteda je samo jedan bod.
To se dogodilo zahvaljujući dramatičnom preokretu u gradskom derbiju koji je pripao “crvenim đavolima” poslije odličnog drugog poluvremena.
U prvih 45 minuta Junajted je bio bolji rival na “Teatru snova”. Ekipa menadžera Erika ten Haga bila je mnogo konkretnija od “građana” koji nisu stvorili nijednu pravu priliku, a ubojiti špic Erling Haland bio je potpuno odsječen od ostatka tima.
U 57. minutu Gvardiola je iz igre izveo Fodena, a na teren poslao Džeka Griliša. Samo tri minuta kasnije Mahrez i De Brujne su odlično iskomibnovali po desnoj strani. Kapiten Sitija je fenomenalno centrirao i pronašao Griliša na drugoj stativi koji je glavom matirao De Heu.
Igrao se 78. minut kada je Kazemirao poslao pas ka Rašfordu koji je “debelo” bio u ofsajdu, ipak, napadač Junajteda nije pipnuo loptu, iako se kretao ka njoj. Umjesto Rašforda, šut je uputio Fernandeš koji se ubacio iz drugog plana i postigao gol o kojem će se mnogo pričati.
Samo četiri minuta kasnije potpuni preokret. Mladi rezervista Alehandrao Garnačo, koji je svojim ulaskom u igru u 72. minutu umjesto Eriksena unio živost u igru “crvenih đavola”, imao je puno prostora po lijevoj strani, sjajno je okrenuo Ake i centrirao pravo na nogu Rašforda kome nije bilo teško da iz peterca postigne gol za ogromnu radost domaćih.
Nakon nove pobjede, devete u nizu, Junajted je na samo bod od Sitija, dok lider Arsenal Ten Hagovom timu bježi šest bodova, ali ima i utakmicu manje.