Fudbaleri Juventusa i Rome odigrali su neriješeno 1:1 u derbiju kola u Seriji A.
Na kraju, bodom mogu biti zadovoljniji gosti iz Rima koji su golom Tejmija Ejbrahama u drugom poluvremenu, anulirali prednost Juventusa.
Trener Rome Žoze Murinjo bio je veoma ljut na svoje izabranike, naročito zbog igre u prvom poluvremenu.
Portugalac je priznao da je bio bijesan i da je u svlačionici dobro izgrdio igrače.
“Rekao sam svojim igračima u poluvremenu da ih se stidim. Nije to bila taktička stvar, bilo je to jednostavno njihovo ponašanje. Ne možemo da dođemo na ovo mjesto i igramo na taj način. Rekao sam Salvatoreu Fotiju na klupi, moli se da ostane samo 1:0. Jer gubiti sa 1:0 je fantastičan rezultat poslije našeg izdanja u prvom poluvremenu, gdje smo imali mnogo sreće”, kaže Žoze.
Utisak je popravljen u nastavku meča.
“Nismo u prvom dijelu uradili apsolutno ništa, imali smo samo sreću. U drugom dijelu je na terenu bio sasvim drugačiji tim, mada nažalost nisam imao mnogo opcija na klupi, jer su Zaniolo i Vajnaldum povrijeđeni”, zaključio je Murinjo.