Košarkaš Cedevite Filip Krušlin uvjeren je da će njegova ekipa izboriti plasman u finale ABA lige.
Zagrepačni su sinoć izgubili od Budućnosti, pa će konačna odluka pasti u Draženovom domu idućeg vikenda kada će se igrati majstorica.
“Igrači Budućnosti su bili jako naoštreni i za provokacije i za sve. Nadam se da će se dobro pripremiti za treću utakmicu, jer će otići poslije kući pognute glave”, smatra Krušlin.
Priznaje Krušlin da je aktuelni prvak bio bolji u Podgorici.
“Istina je da su kvalitetnije odigrali od nas i to je presudilo u ovom meču. Igrali smo dobro prvo poluvrijeme, ali smo imali određene minute dekoncentracije u drugom dijelu i to je odvelo meč na njihovu stranu”, istakao je on.
Majstorica je na programu u nedjelju u 19 časova.