Inicijativa “Zaštitimo hrvatsku kunu” juče je na Trgu bana Jelačića u Zagrebu počela sa skupljanjem potpisa građana za raspisivanje referenduma kojim, kako kažu, hrvatskom narodu žele omogućiti da sami odlučuju o vlastitoj novčanoj valuti.
Kako prenose hrvatski mediji, potpisi će se prikupljati na više od 250 lokacija širom Hrvatske, a građani će se izjašnjavati jesu li za to da u Ustav Hrvatske uđe član koji glasi da je novčana jedinica Republike Hrvatske – kuna, koja se dijeli na stotinu lipa.
Takođe, traže da dio Ustava bude i da odluku o promjeni novčane valute u Hrvatskoj donose birači na referendumu.
Inicijativu su zajednički pokrenuli Hrvatski suverenisti i Hrvatska stranka prava (HSP) i, prema njihovim riječima, u narednih 15 dana, koliko iznosi propisani zakonski rok, na više od 250 lokacija diljem zemlje nastojaće prikupiti oko 370.000 potpisa hrvatskih građana.
Taj broj predstavlja 10 posto potpisa od ukupnog broja birača u Hrvatskoj prema popisu iz 2011. godine, kako bi se raspisao referendum na kojem bi građani odlučili jesu li protiv uvođenja eura kao valute.