Na Zapadnom Balkanu postoji ozbiljan potencijal stvaranja nestabilnosti jer je to područje poligon za geostrateška nadmetanja, kazao je šef hrvatske diplomatije Gordan Grlić Radman.
Grlić Radman razgovarao je s bugarskom koleginicom Teodorom Genčovskom u Zagrebu, a nakon sastanka je istakao kako su se složili da je potrebno učiniti sve da se posljedice ruske agresije na Ukrajinu “ne bi prelile na područje zapadnog Balkana i jugoistočne Europe”.
“Tu postoji nažalost još uvijek u stanovitom smislu ozbiljan potencijal stvaranja nestabilnosti budući da je Zapadni Balkan takođe i poligon za razna geostrateška nadmetanja”, kazao je novinarima Grlić Radman, prenijela je Hina.
Bezbjednosna saradnja
Genčovska je u tom kontekstu istakla da je bugarsko-hrvatska saradnja u sklopu NATO-a “jako dobra” te da saradnja između članica NATO-a uslovljava i sigurniji jugoistok Evrope.
Napomenula je kako je Bugarskoj važna i Inicijativa tri more pogotovo zbog energetske nezavisnosti, rekavši kako ta inicijativa “dobija puno veći značaj” i zbog rata u Ukrajini.