Članovi Predsjedništva BiH Milorad Dodik, Željko Komšić i Šefik Džaferović dogovorili su se da otkažu dvije današnje sjednice, na kojima je trebalo da se glasa o Godišnjem nacionalnom programu (ANP) za NATO i imenovanju mandatara za predsjedavajućeg Savjet ministara BiH.
“Lako smo donijeli ove zaključke, bez rasprava. Znali smo 15 minuta prije u kojem pravcu ćemo ići. Nije bilo potrebe za dramatikom i dizanjem tenzija”, kazao je Komšić novinarima u Sarajevu.
On je dodao da su se svi trudili da ostanu otvorena vrata za novi dogovor, te da nijesu željeli da dođe do preglasavanja.
“Džaferović i ja bi, vjerovatno, glasali za ANP, a Dodik protiv. Onda bi išao vitalni nacionalni interes, pa bi to išlo u Narodnu skupštinu RS i završilo bi kao Pelješki most. Da smo poslije toga glasali o mandataru, onda bi eliminisali Zorana Tegeltiju”, rekao je Komšić.
Prema njegovim riječima, u narednom periodu će se tražiti rješenje za nastavak ovih procesa.