Stanišić: Presudom je poručeno da možete ubiti nekoga, a da ne odgovarate zbog toga

Vladimir Stanišić, momak preminule Maje Šljivančanin, koja je stradala u pomorskoj nesreći kod Budve kaže da je razočaran i ljut zbog donijete presude.

“Teško mi je jer moje Maje više nema i ne mogu je vratiti, ali mogu da se borim za pravdu. Ljubav prema njoj me na to obavezuje. Jasno je svima da ovo djelo nije primjereno osuđeno. Presudom je poslata poruka da možete ubiti nekoga, a da ne odgovarate zbog toga”, navodi on.

Stanišić pita da li je cijena života 120 časova društvenog rada?

“Zar se tih 120 sati može mjeriti s njenom prerano ugašenom mladošću? Zar može biti zamjena za naše propale planove, za njen tek započeti život, za njenu i za našu budućnost? Kakav je osjećaj u ovom trenutku to znam samo ja. Svoj bol dostojanstveno nosim, ali tražim da ne zaboli i nekog drugog na ovaj način. Ne mogu a da se ne zapitam da li je pravda i dalje dostižna ili je ovom presudom i ona ubijena baš kao i moja Maja”, poručuje Stanišić.

Podsjetimo, i Stanišić je povrijeđen u nesreći, za koju je sedamnaestogodišnji M. S. iz Beograda osuđen na 120 sati društveno korisnog rada i pojačan nadzor socijalne službe.